ಕುಲದಲ್ಲಿ ಕೀಳ್ಯಾವುದೋ

ಕುಲದಲ್ಲಿ ಕೀಳ್ಯಾವುದೋ ಹುಚ್ಚಪ್ಪ

ಮತದಲ್ಲಿ ಮೇಲ್ಯಾವುದೋ

ಹುಟ್ಟಿ ಸಾಯುವ ಮನ್ಷಾ ಮನ್ಷಾನ್ ಮಧ್ಯ

ಕೀಳ್ಯಾವ್ದು ಮೇಲ್ಯಾವುದೋ ||

ತಿಲಕ ಇಟ್ಟರೆ ಸ್ವರ್ಗವು ಸಿಗದು

ವಿಭೂತಿ ಬಳಿದರೆ ಕೈಲಾಸ ಬರದು

ಇಟ್ಟ ಗಂಧ ಬೂದಿ ನಾಮ

ಚಟ್ಟ ಕಟ್ಟಲು ನಿರ್ನಾಮ ||

ಶೈವರಿಗೆಲ್ಲ ಶಿವ ದೊಡ್ಡೋನು

ವೈಷ್ಣವರಿಗೆ ಹರಿ ಸರ್ವೋತ್ತಮನು

ಉತ್ತಮ ಮಧ್ಯಮ ಅಧಮರೆಲ್ಲರೂ

ಸತ್ತ ಮೇಲೆ ಸಮರಾಗ್ತಾರೋ ||

ತಲೆಗೊಂದು ರೀತಿ ನೀತಿಯ ಜಾತಿಯ

ಹೇಳುವ ಜೋಗಿ ಸಿದ್ಧರು ಗುರುಗಳು

ಮಸಣದಲ್ಲಿ ಈ ವೀರಬಾಹುವ

ಕೈಯ ಮೇಲ್ಗಡೆ ಸಮರಾಗ್ತಾರೋ ||